Einangrun efstu plötu

Við val á einangrun á steyptri efstu plötu undir stóluðu þaki kemur til greina að nota létta steinull í rúllum, Þakull með áföstum vindpappa eða innblásna lausull. Samkvæmt byggingarreglugerð er U-gildiskrafa 0,20 W/m²K fyrir stólaða efstu plötu. Þykkt einangrunarlags fer eftir varmaleiðnitölu einangrunar og þarf því um 220 mm af léttull, 180 mm af Þakull og um 232 mm af lausull til að uppfylla kröfur byggingarreglugerðar án tillits til áhrifa hugsanlegra kuldabrúa.

Steinull sem hefur rúmþyngd frá 22 – 50 kg/m³ þarf að vindverja til að koma í veg fyrir að lofthreyfing verði í einangruninni og dragi þannig úr virkni hennar. Þessi vindvörn má ekki vera þéttari en 20 Pam. Vindpappi á Þakull er um 3 Pam sem samsvarar Z-gildi 1,5 GPasm²/kg, samkvæmt SI kerfinu.

Æskilegt er að setja vindvörn á alla lárétta einangrun sem er ofan á efstu efstu plötu undir stóluðu þakvirki eða á milli togbanda í þaki byggðu upp með kraftsperrum.

Í núgildandi byggingarreglugerð nr 112/2012 í grein 9.6.10 og 9.6.15 er kveðið á um að brennanlega einangrun má ekki nota óvarða ofan á loftaplötu að þakrými.