Steinull hf fær umhverfisverðlaun atvinnulífsins 2015.

Steinull hf fær umhverfisverðlaun atvinnulífsins 2015.

Steinull hf. var í dag valið umhverfisfyrirtæki ársins 2015 af Samtökum atvinnulífsins.

Einar Einarsson framkvæmdastjóri tók við verðlaununum úr hendi Ólafs Ragnars Grímssonar forseta Íslands, við athöfn á Umhverfisdegi atvinnulífsins 2015. Í ávarpi við afhendinu þakkaði Einar fyrir þá viðurkenningu sem fyrirtækið og starfsfók þess fengi með þessu vali, þau væru hvatning til að halda áfram á þeirri braut sem mörkuð hefur verið í gæða- og umhverfismálum.

Rökstuðningur dómnefndar

Dómnefnd verðlaunanna skipuðu þau Helga Jóhanna Bjarnadóttir, sviðsstjóri umhverfismála hjá verkfræðistofunni Eflu, formaður, Ari Kristinn Jónsson, rektor Háskólans í Reykjavík og Þorsteinn Ingi Sigfússon, forstjóri Nýsköpunarmiðstöðvar Íslands. Rökstuðningur dómnefndar fyrir valinu á Steinull hf var þessi:

“Umhverfisfyrirtæki ársins er rótgróið og stundar framleiðslu á vörum sem eru í  alþjóðlegri samkeppni. Fyrirtækið nýtir að mestu innlent hráefni til framleiðslunnar sem engin hætta er á að gangi til þurrðar. Öndvert við flesta keppinuta sína erlendis nýtir fyrirtækið einungis innlenda endurnýjanlega raforku til framleiðslunnar og útstreymi gróðurhúsalofttegunda er minni en hjá keppinautunum. Kolefnisspor framleiðsluvörunnar er því lægra en hjá samkeppnisaðilunum. Undanfarin ár hefur verið lagt kapp á að draga úr úrgangi og stór hluti hans er nú endurnýttur í framleiðsluferlinu. Einnig hefur verið unnið að áhættugreiningum, forvörnum og úrbótum í vinnuumhverfinu. Framleiðsluvörur fyrirtækisins hafa hlotið vottanir erlendra úttektaraðila fyrir gæði og að uppfylla staðla sem um þær gilda. Fyrirtækið hefur hlotið vottun fyrir gæðakerfi samkvæmt ISO 9001 staðlinum. Það hefur einnig fengið vottun samkvæmt umhverfisstaðlinum ISO 14001 og stefnt er að því að ljúka vottun samkvæmt vinnuverndarstaðlinum OSHAS 18001 á næsta ári. Fyrirtækið hóf starfsemi sína fyrir réttum 30 árum og hefur í mörg ár hlotið viðurkenningu Creditinfo sem fyrirmyndarfyrirtæki”