Einangrun efstu plötu

Við val á einangrun á steyptri efstu plötu undir stóluðu þaki kemur til greina að nota létta steinull í rúllum, Þakull með áföstum vindpappa eða innblásna lausull. Samkvæmt byggingarreglugerð er U-gildiskrafa 0,20 W/m²K fyrir efstu plötu með uppstóluðu þaki yfir. Þykkt einangrunarlags fer eftir varmaleiðnitölu einangrunar og þarf því um 225 mm af léttull, 200 mm af Þakull og um 240 mm af lausull til að uppfylla kröfur byggingarreglugerðar án tillits til áhrifa hugsanlegra kuldabrúa.

Steinull sem hefur nafnþyngd á bilinu 22 – 50 kg/m³ þarf að vindverja til að koma í veg fyrir að lofthreyfing verði í einangrun og dragi þannig úr virkni hennar. Þessi vindvörn má ekki vera þéttari en 20 Pam. Vindpappi á Þakull er um 3 Pam sem samsvarar Z-gildi 1,5 GPasm²/kg, samkvæmt SI kerfinu.

Æskilegt er að setja vindvörn á alla lárétta einangrun sem er ofan á efstu plötu undir stóluðu þakvirki eða á milli togbanda í þaki byggðu upp með kraftsperrum.

Í núgildandi byggingarreglugerð nr 112/2012 í grein 9.6.10 og 9.6.15 er kveðið á um að brennanlega einangrun má ekki nota óvarða ofan á loftaplötu að þakrými.